Convocatoria

I Premiu Les Asturies

§ Ensertáu nel proyeutu Finxos, el Conceyu d’Estudios Xaviel Vilareyo trabaya por atropar los artículos y ensayos alrodiu’l país de Xaviel Vilareyo y Villamil (Mieres del Camín, 1967-Uviéu, 2015), faciendo por honrar la so memoria y espoxigar el so llabor. Poro, convoca’l I Premiu LES ASTURIES d’ensayu, cola fin d’afalar la investigación y destacar aquellos trabayos qu’afonden na idea de Les Asturies y los países cultural ya históricamente venceyaos, dende un planteamientu non ideoloxizáu, que va mandase de les siguientes BASES: Primera: Pueden participar na convocatoria toles persones interesaes, soles o en grupu, ensin tope d’edá, con obres d’ensayu y trabayos d’investigación tanto n’asturlleonés o eonaviegu como en castellán, que afonden na idea de LES ASTURIES y los países cultural ya históricamente venceyaos, dende un conceptu integrador non ideoloxizáu y dende cualaquier perspeutiva yá fuere cultural, xeográfica, histórica, xurídica, económica, etnolóxica, política… valorándose les propuestes y analises que partiendo de la realidá coxuntural europea d’anguaño abran o afiten perspeutives a futuru, valibles pa la sobrevivencia de la propia entidá política. Segunda: Los orixinales habrán ser preferiblemente inéditos y presentase en formatu dixital (.doc, .docx o .rtf) en Verdana 11 puntos o similar a doble espaciu, meyor con una estensión aprosimao pente les mil quinientes (1.500) y quince mil (15.000) palabres. Tercera: Los trabayos empobinaránse per e-mail a: info@finxos.org, enantes del día 31 d’avientu de 2016, incluyendo datos personales y una ficha biográfica del autor o autores, másimo de 500 palabres. Cuarta: El premiu consistirá na distinción del trabayu como I PREMIU LES ASTURIES d’ensayu y la so PUBLICACIÓN electrónica baxo llicencia Creative Commons na Biblioteca Xaviel Vilareyo, la reconocencia y l’espardimientu al traviés d’Internet y les redes sociales. El xuráu puede conceder tamién accésit a otres obres o dexar el premiu ermu, según el so criteriu. Quinta: El xuráu tará formáu por persones averaes al proyeutu Finxos. Sexta: Al fallu del xuráu nun se puede retrucar. Faráse públicu el día 19 de mayu de 2017, coincidiendo col cabudañu de Xaviel Vilareyo y la convocatoria de la viniente edición del premiu. Sétima: Los trabayos que nun se premien podrán tamién publicase nes mesmes condiciones descrites col preste los sos autores, pasando a formar parte del fondu documental del proyeutu. Octava: Presentase al premiu supón tar conforme con estes bases. Custiones ayenes que nun tuvieren afitaes nelles podrá resolveles el xuráu. Uviéu, 19 de mayu de 2016.

www.finxos.org

an asturian think tank