Short Chavacano Story

El Verdadero Amigo

By: Victoria D. Mangaser, Ph. D

El Verdadero Amigo

By: Victoria D. Mangaser, Ph. D

Man buen amigo si Toto y si Tata. Si Toto un berde Turtuga y si Tata, un palaka. Buen vecinos sila ta queda na canto de rio. Pirmi si Toto ta ayuda con Tata Palaka. Pirmi si Toto Turtuga ta dale con ele comida y ta extende ayuda si ta necesita le. Junto tamen sila pirme ta camina, ta pacia, y ta juga. Quierre quierre sila juga junto con el maga pescao, maga camaron y otro maga palka. Paborito tamen di ila mira con el apan, pajaro y mariposa ta bula na rio.

Un dia tiene maga palaka de pueblo ya pacia na di ila rio. Ya conose estos con Tata Palaka. Ta admira gad ele con estos cay bien bonito gayot sila canta y baila. “Puede ba ustedes canamon dos del di mio amigo Turtuga enseña el di ustedes bonito cancion y baile?” ya pregunta si Tata Palaka. “Itu, puede..pero ese tu uban Turtuga, hinde. No quierre kame maga mahina mobe y maga marusing man junto canamon. Hinde came ta gusta ese su grande casa lleva’y lleva ele,” ya contesta el maga palaka de pueblo. “Bene ya tu, deja ya tu conese Turtugaali.” Ya abla el maga palaka.

Por el deseo de aprende Nuevo baile y cancion, ya déjà si Tata con Toto Turtuga..

Un dia malo el tiempo, ya combida el maga palaka con Tata Palaka para na medio del rio para baila y canta. “Maka miedo anda alli na medio kay puerte el marihada y manada palo ta sigue.”

Ya reh qui reh el maga palakacon Tata Palaka. “Ha ha ha, medutin gale tu!” Si no quierre tu, kame anda.” Abla el maga palaka. Ya sigue lang siempre si Tata Palaka kay no quierre ele llama con ele medutin.

Cuando ya guinda sila na hondo parte del rio, un puerte marijada el ya rimpuja con el maga palaka para na maga rama de palo. Yan ipitel pies di Tata Palaka na maga rama. No puede ya le nada. “Ayuda comigo! Ayuda comigo!” ya grita con el otro maga palaka. No hay ni uno del otro maga palaka el ya ayuda con Tata Palaka. Ta pricura lang salva di ila maga cuerpo.

Hinay hinay ta sinti le kay tan lumus ya le. Pensaba le ay muri ya le, Cuando ya mira le con Toto Turtuga ta quita el palo na disuu pies. Ya queda le bien alegre kay tiene con ele ya ayuda.Ya puede ya nada si Tata Palaka para na urilla.

“Muchas gracias Toto Turtuga. Tu el verdadero amigo.”

Arranged by: Neng R. Concepcion

Thank you…