PARA LER

Novelas xuvenís

Carta al rey (Tonke Dragt). Un adolescente, fillo dun cabaleiro e

escudeiro do rei do seu país, mentres está a velar as armas para

converterse en cabaleiro, recibe unha estraña visita que lle solicita

axuda para entregar unha carta fundamental para a paz dun país

veciño. A pesar do perigoso da misión, emprende o camiño para

poder entregala.

Cruzada en jeans (Thea Beckman). Debido a un accidente

imprevisto nunha máquina do tempo, o protagonista, un rapaz do

século XX, acaba nas cruzadas e contempla desconcertado o mundo

medieval. Comparte as penalidades dos soldados cristiáns e, cos

coñecementos do seu mundo, axúdaos a saír de numerosos perigos.

Finalmente, Rudolf regresa ao século XX.

El chico que quería convertirse en ser humano (Jorn Riel). No ano

1000, un mozo viquingo quere vingar a morte de seu pai e inicia

unha viaxe cara a Grenlandia, pero naufraga. Recólleno uns

esquimós que o coidan e ensinan os seus costumes e a súa lingua, de

modo que o protagonista decide quedar a vivir entre eles.

El joven templario (Michael P. Spradlin). Triloxía protagonizada

por Tristán, un monxe da orde do Temple e os seus compañeiros que

viven aventuras en Terra Santa durante a época das cruzadas.

El manuscrito de fuego (Rafa del Río). Aventuras dun grupo de

amigos no Xapón feudal ambientadas nunha pequena aldea na que

funciona unha das mellores escolas de ninjas e kunoichi do país.

Nesta escola estarán durante unha semana demostrando ter dotes

suficientes para superar as probas marcadas e poder entrar nela.

El médico del sultán (César Vidal). O médico e filósofo xudeu

Maimónides, que vive na cidade exipcia de Fostat, decide dedicarse

ao estudo do Talmud para axudar aos seus fronte aos musulmáns,

pero as circunstancias fan que teña que volver a practicar a medicina

como médico de campaña na guerra que o sultán Saladino levaba a

cabo contra os cristiáns en Terra Santa.

El perro de Gudrum (César Vidal). Historia ambientada nas loitas

sostidas entre os saxóns ingleses cos invasores viquingos daneses.

Na batalla que tivo lugar no ano 878 enfrontáronse o rei Alfredo e

Gudrum que, logo da súa derrota, converteuse ao cristianismo.

Finis Mundi (Laura Gallego García). Un trío formado por un monxe

que coñece ben as profecías que anuncian a fin do mundo no ano

1000, un trobador e unha moza que desexa ser tamén trobadora,

emprenden unha viaxe para invocar o Espírito do Tempo e evitar a

fin do mundo.

Ivanhoe (Walter Scott). A acción transcorre na época das cruzadas,

de encarnizadas loitas entre pobos que foran irmáns, os saxóns e os

normandos, cando o príncipe Xoan sen Terra trata de coroarse rei en

ausencia de Ricardo Corazón de León que está en Terra Santa.

Ricardo precisa a axuda dun cabaleiro valoroso e fiel e ese será

Wilfred Ivanhoe.

La cripta de los templarios (Manuel Nonídez). Dúas narracións

corren paralelas: a duns arqueólogos que descobren restos humanos

e moedas entre as ruínas dun vella torre e as aventuras de dous

cabaleiros da orde do Temple que no século XIV refuxiáranse nesa

torre para protexerse dunha forte treboada.

La maldición del arquero (Joan Manuel Gisbert). Un mozo

campesiño abandona a aldea para tratar de converterse en arqueiro

do rei, pero na viaxe cara ao castelo sufre un incidente que o obriga

a cambiar de rumbo e altera os seus proxectos.

La mandrágora de las doce lunas (César Vidal Manzanares).

Partindo dun feito histórico –a expedición viquinga contra Al

Andalus do ano 845- o autor recrea unha historia centrada na busca

da mandrágora, unha planta á que se lle atribúen poderes máxicos,

por parte de Oslo, un cristián que debe entregar esa planta para

poder rescatar á súa filla, prisioneira dos musulmáns.

Robin Hood (Walter Scott). Robin Hood vai casar con Mariana

Gilewater cabdo interrope a cerimonia un grupo de soldados do

príncipe Xoán que declara a Robin fóra da lei. Este refúxiase no

bosque de Sherwood converténdose no príncipe dos ladróns. Logo

de mil aventuras, Robin descubre no bosque ao rei Ricardo Corazón

de León, que regresa das cruzadas. Este devolve os títulos a Robin e

por fin pode casar coa súa amada Mariana.

Un yanqui en la corte del rey Arturo (Mark Twain). Viaxe no

tempo de Hank, desde a súa Connecticut natal en 1879 ata a

Inglaterra medieval. Todo é froito da perda de coñecemento que

sufre durante unha pelexa. Cando esperta é convertido en prisioneiro

por un cabaleiro que o leva á corte do rei Arturo.

Outras novelas

Crónicas del señor de la guerra (Bernard Cornwell). Tras a saída dos romanos de

Britana xorden as loitas polo poder. Os saxóns ameazan con invadir o país e a morte do

rei complica a situación, pois o herdeiro é un neno. Unicamente hai un home que pode

salvar o reino, Arturo, un guerreiro mítico que vive protexido polo mago Merlín. Así

comezan as venturas e desventuras deste guerreiro que logra tempos de paz alternados

con outros de guerras e conquistas. Pero o ciclo de Arturo toca fin; a maxia e os antigos

deuses sucumben fronte ao cristianismo.

El caballero del templo (José Luis Corral). Narración ambientada en

sucesos relacionados coa etapa final da Orde do Temple na que se

mesturan episodios das cruzadas e a busca do Santo Grial e que teñen

como protagonista ao templario Xaime de Castelnou.

El médico (Noah Gordon). A novela describe a paixón dun home do

século XI por vencer a enfermidade e aliviar a dor allea a través da

medicina. Levado por esta paixón, inicia unha longa viaxe desde

Inglaterra a Persia onde vive, traballa e experimenta o máis

destacado médico da época, Avicena, do que aprenderá as primeiras

armas da medicina moderna.

El Papa niño (Peter Prange). En 1032, Teofilacto de Túsculo, de 12

anos, converteuse no Papa máis novo da historia co nome de

Benedito XI. Para moitos foi un libertino pero para outros foi un

xoguete manipulado por cardeais e bispos da súa curia. Pero os

maiores inimigos xurdiron cando tratou de acabar coa corrupción

vaticana.

Hildegarda de Bingen (Régine Pernoud). Esta muller foi unha

humilde abadesa alemá do século XII, mística, escritora e

compositora de máis de setenta sinfonías. Os seus sermóns eran

famosos e a ela acudían para consultar todo tipo de asuntos desde os

máis humildes aos emperadores.

Historia del Rey Transparente (Rosa Montero). No século XII,

Leola, unha moza campesiña, vístese coas roupas de ferro dun

guerreira ao que atopa morto. É o inicio dunha novela de aventuras

con elementos fantásticos e tamén do mundo actual.

La sombra el templario (Nuria Masot). En 1265 o Papa, uns

cabaleiros da orde do Temple e un espía tratan de apoderarse dun

pergameo que contén un poderoso secreto. A busca deste documento

provoca varias mortes. Cal é o seu contido e por que tantas persoas

van tras el provocando mortes e desdichas?

Las cruzadas vistas por los árabes (Amin Maalouf). A parir de datos

de cronistas da época e de historiadores, o autor relata a historia das

cruzadas tal e como as viviron no outro campo, o lado musulmán.

Northumbria, el último reino: Sajones, Vikingos y Normandos (Bernard Cornwell). A

novela comeza no ano 866 e está centrada na vida de Utherd, un mozo anglo-saxón que

debe decidir que bando tomar: o dos viquingos cos que se criou ou o do rei Alfredo de

Wessex, por quen non sente ningunha simpatía debido ao modo co que impuxo o

cristianismo. Son tempos escuros nos que Inglaterra comezaba a configurarse e

debaterse entre o choque cultural dos anglosaxóns e os daneses, entre o paganismo e o

cristianismo.

Los devoradores de cadáveres (Michael Crichton). No século X, o

califa de Bagdad envía un embaixador ao rei dos búlgaros, pero o

emisario é secuestrado polos viquingos. Para diplomático, os

costumes bárbaras dos pobos escandinavos resultan salvaxes pero

tamén fascinantes. E xunto a eles e ao seu xefe Buliwyf emprende

unha trepidante aventura: loitar contra os que se comen aos mortos.

Adaptación ao cine co título O guerreiro nº 13.

PARA VER

Arn, el caballero templario (2007). Historia ambientada a mediados

do século XII centrada na vida de Arn Magnusson, un mozo sueco

de ampla cultura e hábil coa espada namorado de Cecilia. Pero as

circunstancias obrigan a separarse aos amantes e mentres ela ingresa

nun convento, el marcha ás cruzadas como cabaleiro templario.

Becket (1964). Recreación do drama histórico sobre o

enfrontamento entre o rei Henrique II de Inglaterra e o seu chanceler

e arcebispo de Canterbury, Tomas Becket, a raíz da decisión real de

recortar prerrogativas á igrexa en 1164.

El aliento del diablo (1993). Damián e a súa familia tratan de

instalarse nun lugar co obxectivo de mellorar as súas condicións de

vida, pero o territorio está dominado por un tirano nobre que intenta

seducir á súa muller. Para sobrevivir terán que enfrontarse ao señor

feudal.

El arquero de Sherwood (1971). Historia de Robin Hood, que cos

seus amigos do bosque de Sherwood agarda o momento de

recuperar o trono usurpado polo seu irmán mentres Ricardo

Corazón de León loitaba nas cruzadas.

El caballero del dragón (1985). Aventuras e fantasía ambientadas

na Idade Media arredor das lendas sobre dragóns, animais temidos

que cómpre exterminar para que non acaben cos humanos e outros

animais. Neste caso, o dragón chega ao castelo de Ruk pola

invocación máxica do alquimista Boecius e ante o perigo que supón

a súa presenza, os habitantes do condado néganse a pagar máis

tributos ata que alguén consiga acabar coa temible fera.

El caballero verde (1984). A decadencia ameaza a corte do rei

Arturo pero un día chega a Camelot un home que se fai chamar O

cabaleiro verde e desafía os cabaleiros da Mesa Redonda a un

xogo: mentres el permaneza inmóbil calquera lle poderá cortar a

cabeza. Pero soamente un acepta o reto.

El capitán fuego (1958). A finais do século XIII un pequeno río

separa os dominios do vingativo e cruel barón Oddo de Serra dos do

xeneroso conde Gualtiero de Roccalta. Un día un campesiño é

descuberto mentres cazaba nas terras do conde, pero este, en lugar

de condenalo o deixa libre. Comeza entón a axudar os que cruzan o

río para liberarse da tiranía do barón e pasa a ser coñecido como o

Capitán fogo. Como vinganza, o barón fai asasinar o conde e culpa o

Capitán, pero coa axuda dos seus amigos logra demostrar a súa

inocencia.

El cerdo de Wat (1996). Película de animación centrada na historia

de dous príncipes xemelgos que foron separados ao nacer: un vive

con luxo como conde e o outro é un pobre campesiño que foi

criado por un agarimoso porco. Pero o destino volve xuntalos e lles

trae numerosas sorpresas.

El guerrero nº 13 (1999). Aventuras dun guerreiro persa que, tras

ser expulsado das súas terras, viaxa ao norte e acaba axudando a un

grupo de viquingos que son atacados por un pobo salvaxe que

destrúe o seus poboados.

El halcón y la flecha (1950). Aventuras ambientadas na rexión de

Lombardía no século XII onde os seus habitantes viven tiranizados

polo conde xermano coñecido cono O Falcón. Un grupo de valentes

trata de liberarse deste dominio loitando coas armas e as estratexias

da época.

El león en invierno (1968). No Nadal de 1183 o rei de Inglaterra,

Henrique II, reúne a toda a familia para decidir quen será o seu

sucesor. Tamén está a súa muller, a intrigante Leonor, repudiada e

encarcerada nunha torre, e os tres fillos: Geoffrey, John e Richard

quen, poucos anos antes e instigados pola súa nai, subleváranse

contra seu pai.

El médico (2013). Adaptación cinematográfica da novela do mesmo

título de Noah Gordon que narra a historia de Rob Cole, un neno

orfo na Inglaterra do século XI que, tras ver morrer a súa nai, decide

que quere ser médico e aprender cos mellores. Para iso terá que

viaxar ata Persia, onde vive o máis importante da época, Ibn Sina, e

con el aprenderá o máis destacado da ciencia médica da época.

El pequeño mago (2012). Película de animación sobre aventuras

duns normandos que asaltan un barco, pero grazas á maxia do fillo

do patrón, Bieito Dubidoso, os asaltantes teñen que fuxir. Isto lle

procura gran fama e provoca as envexas do bispo señor da cidade

que non lle perdoa que o deixase en evidencia pola súa covardía.

El primer caballero (1995). A chegada do cabaleiro Lanzarote ao

reino de Camelot altera a vida dos seus habitantes, especialmente a

posición de Lady Ginebra, que casara con Arturo para asegurar a

protección do reino, pero que se namora do valente cabaleiro.

El príncipe valiente (1954). O príncipe Valiant é enviado polo seu

pai á corte do rei Arturo para ser armado cabaleiro. O seu

obxectivo é estar preparado para enfrontarse ao tiránico Slaigon,

que usurpou o trono paterno.

El reino de los cielos (2005). Aventuras de cruzados en Terra Santa

durante século XII. Godofredo de Ibelin e seu fillo Balian loitan por

manter a paz en Xerusalén, pero as tensións entre cristiáns,

musulmáns e xudeus fan moi difícil o seu mantemento e as loitas

son continuas.

El secreto del libro de Kells (2009). Animación. Aventuras de

Brendan, un monxe novizo de 12 anos da abadía de Kells, na Irlanda

do século IX, onde axuda a construír unha forte muralla para

protexerse dos ataques dos viquingos. Pero a súa vida cambia cando

coñece a un monxe miniaturista e un libro ilustrado inacabado. Para

rematar o libro e enfrontarse aos seus medos, sae da abadía e penetra

nun bosque encantado no que lle esperan mil aventuras.

El señor de la guerra (1965). Durante o século XI, un cabaleiro

normando convértese en señor feudal nunhas terras habitadas por

xente semi salvaxe, pero namórase dunha misteriosa muller pola

que acaba perdendo o poder e o honor.

Erik, el vikingo (1965). O xefe viquingo Thorbald repartiu o reino

entre seu fillo Erloff e o seu sobriño Erik, que recibe a misión de

organizar unha expedición para conquistar e colonizar novas terras

e así tratar de non caer baixo o dominio danés. As tensións entre os

herdeiros dificultan a consecución do obxectivo de Erik.

Ivanhoe (1952). O cabaleiro Ivanhoe trata de conseguir o rescate

para liberar ao seu rei, Ricardo Corazón de León, feito prisioneiro

cando regresaba das cruzadas, rescate que se nega a pagar o seu

irmán Xoán porque así pode seguir usurpando o trono de Inglaterra.

La sangre de los templarios (2004). Entre as orden militares eran

frecuentes as disputas, especialmente coa orde dos templarios,

gardiáns do Santo Grial, unha das reliquias máis valiosas e que

provoca a envexa doutros monxes. A Irmandade de Sion trata de

acabar cos poderosos templarios.

Robin, el arquero de Sherwood (1971). Mentres o rei Ricardo

Corazón de León está prisioneiro en Alemaña, seu irmán Xoán

ocupa o trono e goberna despoticamente en Inglaterra. Para loitar

contra o usurpador, Robin Hood organiza desde o bosque de

Sherwood unha revolución para restaurar ao lexitimo rei.

Las nuevas aventuras de Robin Hood (1994). Película de

animación que recrea algúns dos episodios máis coñecidos deste

personaxe. Co remate das cruzadas, Robin Hood e os seus homes

abandonan o refuxio do bosque de Sherwood, pero o malvado

comisario de Nottingham logra fuxir coa valiosa coroa do rei.

Iníciase entón a persecución e a loita dos homes de Robin que non

poden tolerar a situación.

Los vikingos (1958). Aventuras protagonizadas por estes expertos

navegantes procedentes do norte de Europa. Einar e Eric (fillos do

rei Ragnar pero que ignoraban o seu parentesco) ódianse

mutuamente pero acabarán unidos na empresa de rescatar á princesa

Morgana, prisioneira do rei de Inglaterra e da que ambos están

namorados.

Robin Hood (2010). Robin Longstride é un magnífico arqueiro que

regresa das cruzadas nas que loitou ao servizo do rei inglés Ricardo.

Cando este morre, Robin vai a Nottingham para cumprir a promesa

que fixo a Sir Robert Loxley antes de morrer: levar a súa espada a

seu pai e alí coñece a viúva de Robert, Lady Marion. Mentres,

Inglaterra está sacudida por rebelións internas e ameazas externas

que Robin e os seus tratarán de que non se materialicen nunha

guerra civil.

Robin Hood, príncipe de los ladrones (1991). Cando Robin Hood

regresa a Nottingham logo de loitar nas cruzadas e descubre que os

seus habitantes viven na miseria debido ao altos tributos que teñen

que pagar e que o gobernador é o asasino de seu pai, decide tomar

vinganza. Acompañado dun fiel compañeiro sarraceno, desde o

bosque de Sherwood organiza a loita contra o tirano.

Soldado de Dios (2005). A acción transcorre en Terra Santa en 1187

durante as cruzadas onde un monxe da orde dos templarios cae

prisioneiro nunha batalla. Un misterioso viaxeiro musulmán logra

rescatalo e os dous refúxianse nun oasis, pero o secreto que garda o

musulmán fai que sexan atacados polas tropas de Saladino

orixinándose un enfrontamento de terribles consecuencias.