A atmosfera (capa de aire que rodea á Terra) regula a temperatura terrestre e fai que durante o día, a calor circule desde as zonas cálidas ata as frías. Está formada por varias capas:

A troposfera: capa inferior en contacto coa superficie da Terra (ata os 12 km de altitude). Nela prodúcense a maioría dos fenómenos meteorolóxicos.

A estratosfera (dos 12 aos 50 km sobre o nivel do mar). De –5 ºC aos – 60 ºC. Nela atópase o ozono, que protexe a Terra fronte as radicacións ultravioletas, moi prexudiciais para a vida na Terra.

A mesosfera (dos 50 aos 80 km sobre o nivel do mar). A temperatura chegan aos –95 ºC. É a capa máis fría da atmosfera.

A termosfera (dos 80 aos 500 km de altitude). Temperaturas moi altas: pode chegar aos 1.000 ºC.

A exosfera comeza ao final da termosfera e esténdese ata o espazo exterior.

O tempo atmosférico é o estado da atmosfera nun lugar e momento determinado, en períodos de tempo moi curtos.

Clima é o tempo que predomina nun lugar determinado ao longo de moitos anos. Para coñecelo estudamos durante moitos anos...

...a temperatura é a cantidade de enerxía calorífica no aire; mídese co termómetro en graos centígrados.

...as precipitacións, cantidade de chuvia, neve ou sarabia que cae nunha zona. Mídense co pluviómetro en litros por metro cadrado.

...a humidade , cantidade de vapor de auga que se atopa no aire. Mídese co higrómetro e expésase en %.

... o vento (aire en movemento). Cando unha masa de aire se quenta cos raios do sol, aumenta a temperatura e elévase. O espazo que deixa é ocupado por outras masas de aire próximas coa temperatura máis baixa, orixinando unha corrente de aire. A dirección do vento mídese co viraventos, e a velocidade, co anemómetro.

... a presión atmosférica é o peso da columna de aire enriba dun punto determinado. Mídese co barómetro e a súa unidade de medida son os bares.

O clima dun lugar depende de:

_Latitude: canto máis preto do ecuador, clima máis cálido.

_Altitude: canta máis altitude sobre o mar, menor temperatura (1ª menos por cada 150 m que subamos)

_Distancia ao mar: canto máis preto do mar, temperaturas máis suaves.

_Relevo: nas zonas de montaña chove máis que nas chairas.

As zonas climáticas:

• Zona de clima cálido: está situada entre os trópicos de Cáncer e de Capricornio. Temperaturas moi cálidas debido a que os raios solares son perpendiculares á Terra. Dentro desta zona climática diferenciamos os climas ecuatorial, tropical e desértico.

• Zona de clima temperado: situada entre os círculos polares e trópicos. Nesta zona existen grandes contrastes ao longo do ano. Nesta zona, os principais tipos de clima son o mediterráneo, o oceánico e o continental.

• Zona de clima frío: comprende as franxas que van desde os círculos polares ata os polos. Temperaturas moi baixas e apenas existe verán. Os tipos de clima desta zona son o polar e o de alta montaña.

Un climograma é un gráfico no que se representan as temperaturas medias e as precipitacións de cada mes, ao longo dun ano e nun lugar concreto.

Para interpretar un climograma debemos mirar a temperatura media anual, a amplitude térmica (diferenza entre media do mes máis cálido e do mes máis frío), temperaturas medias por meses, precipitacións totais anuais e precipitacións por meses.